Pahale to apane dil ki razaa jaan jaa_iye

Pahale to apane dil ki razaa jaan jaa_iye
phir jo nigaah-e-yaar kahe maan jaa_iye

pahale mizaaj-e-raahaguzar jaan jaa_iye
phir gard-e-raah jo bhii kahe maan jaa_iye

kuchh kah rahii hai aap ke siine kii dharknain
merii sunain to dil kaa kahaa maan jaa_iye

ik dhuup sii jamii hai nigaaho.n ke aas paas
ye aap hain to aap pe qurbaan jaa_iye

shaayad huzuur se ko_ii nisbat hame.n bhii ho
ankhon main jhaank kar hamain pehachaan jaa_iye